PAN-GENTAMİSİN (İnyeksiya üçün məhlul) - PAN-GENTAMICINE

Dərman vasitəsinin istifadəsi üzrə təlimat (xəstələr üçün)

 

ТƏRKİBİ:

Hər ampulda 80mq gentamisin sulfat vardır.  

 

FАRMAKOLOJİ XÜSUSİYYƏTLƏR:

Aminoqlikozid qrupu antibiotikdir. Geniş spektrli bakterisid təsirli aminoqlikozid qrupu antibiotikdir. Pan Gentamisin asanlıqla bakteriyanın hüceyrə membranına daxil olur, 30S bakterial ribosoma bağlanaraq zülal sintezini ingibə edir. Pan Gentamisin geniş antimikrob təsir spektrinə malik olub, qrammusbət və qrammənfi bakteriyalara qarşı yüksək aktivlik göstərir. Qram mənfi mikroorqanizmaların səbəb olduğu infeksiyaların müalicəsində yüksək effekt göstərir. Əzələ daxilinə yeridildikdən sonra tez və praktiki olaraq tam sorulur. Əzələ daxilinə yeridildikdən 30-90 dəqiqə sonra plazmada maksimum konsentrasiya toplayır. Plazmada terapevtik effekt səviyyəsi 6-8 sonra müşahidə olunur. Sinovial, perikardial, plevral, limfatik və peritoneal mayedə asanlıqla paylanır.Sidikdə yüksək konsentrasiya toplayır. Bütün orqan və toxumalarda yüksək konsentrasiya toplayır, əsasən qaraciyər, böyrək və ağciyər toxumasında. Bronxial sekret, bəlğəm, öd, ana südü, onurğa beyni mayesində aşağı konsentrasiyada müşahidə olunur. 10% plazma zülalları ilə birləşir. Pan Gentamisin qaraciyərdə metabolizmə uğramır. 90 % dəyişilməmiş halda sidiklə xaric olunur. Yarımatılma dövrü 2-4 saat təşkil edir.

 

GÖSTƏRİŞLƏR:

  • Sepsis (əsasən yenidoğulmuş uşaqlarda sepsis)
  • Sidikçıxarıcı yolların ağır fəsadlaşmış və residivləşmiş infeksiyaları zamanı
  • Aşağı tənəffüs yollarının infeksiyaları
  • Dəri və yumşaq toxumanın infeksiyalarında
  • Mərkəzi sinir sisteminin infeksiyalarında (əsasən meninqit zamanı) beta-laktam qrupu antibiotiklərlə kombinə şəklində istifadə olunur.
  • Qram neqativ mikroorqanizmlər tərəfindən törədilən ağır bakterial infeksiyalar zamanı
  • Ağır polimikrob infeksiyaların emperik müalicəsi zamanı beta-laktam qrupu antibiotiklərlə və ya klindamisin preparatı ilə kombinə şəklində istifadə olunur.
  • Cərrahi əməliyyatdan sonra profilaktika məqsədilə
  • Uroloji əməliyyatlar (prostat vəzinin endoskopik rezeksiyası və s.)

 

 

ƏKS GÖSTƏRİŞLƏR:

Aminoqlikozid qrupu antibiotiklərinə qarşı yüksək həssaslığı olanlarda istifadəsi əks göstərişdir.

Diqqət: böyrək funksiyasının pozğunluğu və ya vestibulyar aparatın funksiya pozğunluğu zamanı Pan Gentamisin preparatının təyini dayandırılmalıdır, müstəsna hallarda preparatın dozası tənzimlənməlidir. Ağır miasteniyalı xəstələrdə, parkinsonizm və hipokalsemiya zamanı preparat diqqətlə təyin olunmalıdır.

 

HAMİLƏLİK VƏ LAKTASİYA DÖVRÜ:

Hamilələrdə istifadə olunması məsləhət deyildir, çünki, ana bətnində dölə ototoksik təsir göstərir. Laktasiya zamanı: kiçik dozada ana südünə keçir, ona görə laktasiya zamanı diqqətlə istifadə olunmalıdır.

 

ƏLAVƏ TƏSİRLƏR:

Yüksək dozada təyin olunduqda nefrotoksik və ototoksik təsir göstərər bilər. Qanda transaminaza,bilirubun və kreatinin səviyyəsi yüksələ bilər. Silinduruya, proteinuruya, anemiya, hərarət, səpki, baş ağrısı, ürəkbulanma müşahidə edilə bilər.

 

İSTİFADƏ QAYDASI:

Pan Gentamisin əzələdaxili və ya venadaxili inyeksiya şəklində təyin olunur. Düzgün dozalanma kq/çəkiyə görə hesablanır. Müalcə müddəti xəstəliyin dərəcəsindən asılı olaraq 7-10 gün davam edir. 

  • Böyüklərdə:  Sutkalıq doza 3 mq/kq çəkiyə görə hesablanır və bu sutkalıq doza sutka ərzində 2 dəfə təyin olunur. Sidik yollarının infeksiyaları zamanı kq/çəkidən asılı olaraq sutkalıq 120 mq və ya 160 mq birdəfəlik doza təyin olunur, müalcə müddəti xəstəliyin dərəcəsindən asılı olaraq 7-10 gün davam edir.
  • 2 yaşından böyük uşaqlarda: Böyüklərdə olduğu kimi sutkalıq doza 3 mq/kq çəkiyə görə hesablanır və bu sutkalıq doza sutka ərzində 3 dəfə təyin olunur.
  • Vaxtından əvvəl və yeni doğulmuş uşaqlarda: Sutkalıq doza 6 mq/kq çəkiyə görə hesablanır və bu sutkalıq doza sutka ərzində 2 dəfə təyin olunur. Hemodializ zamanı hər hemodializin sonunda sutkalıq doza 1 mq/çəkiyə görə təyin olunur.
  • Venadaxili inyeksiya zamanı: Əzələ daxilinə təyin olunan sutkalıq doza eyni dozada vena daxilinə inyeksiya şəklində təyin olunur. Böyüklərdə həlledici məhlulun (0,9% -li natrium xlorid və ya 5%-li qlukoza məhlulu) ümumi həcmi 100-200 ml təşkil edir.Uşaqlarda həlledici məhlulun ümumi həcmi azaldılır. Pan Gentamisin preparatının həlledici məhlulda konsentrasiyası 1 mq/ml (0,1%) artıq dozada olmamalıdır. Venadaxili inyeksiya 1-2 saat ərzində vena daxilinə damcı şəklində yeridilir.

 

BURAXILIŞ FORMASI: İnyeksiya üçün məhlul ampulda 2ml/80mq  №10, karton qutuda.

İSTEHSALÇI:  Panpharma group, Rotexmedica (Almaniya), NORMA PAN